2022 жылдың 26 қазанында Б.Ахметов атындағы жоғары педагогикалық колледжі мен облыстық білім басқармасының ақпараттық технологиялар орталығы бірлесіп соңғы курс студенттерін болашақта жұмыс істеуге дайындау мақсатында «Kundelik.kz» және «BilimLand» сайттарын пайдалану бойынша оқыту семинарын өткізді.
Ақпараттық-талдау бөлімінің әдіскері Нургалиева Ә.О. мектеп туралы барлық ақпарат жинақталған Kundelik.kz автоматтандырылған ақпараттық жүйесіне шолу жасады. Неліктен бұл платформа қарапайым мектеп күнделігі мен мұғалім журналының цифрлық аналогы болып саналатынын егжей-тегжейлі түсіндіріп, мұғалім, оқушы және отбасы үшін қосымша мүмкіндіктерін атап өтті.
Әдістемелік бөлімнің әдіскері Аккасканова А.Д. синхронды және асинхронды форматта сабақтарды өткізу мүмкіндігі туралы айтып, BilimLand платформасымен таныстырды. Портал синхронды режимде бейнеконференция қызметін ұсынады. Мектеп пәндері бойынша оқу материалдарының үлкен жинағы бар және қолжетімді екені айтылды.
Орталықтың әдістемелік бөлімінің меңгерушісі Акишпаева А.Т. мектеп пәндері бойынша интерактивті сабақтарға, виртуалды зертханаға және itest.kz, imektep.kz, twig-bilim.kz сияқты қосымша ресурстарға кеңінен тоқталды. Біліктілікті арттыру курстары мен сыйлық қоры мол кәсіби жарыстар жайлы ақпарат берді.
Болашақ мұғалімдер «Kundelik.kz» және «BilimLand»» платформаларын пайдалану бойынша әдістемелік ұсыныстар алды, өздерін толғандырған сұрақтарына жауаптар алды, сонымен бірге кәсіби жолды бастар алдында орталықтан қолдауға ие болды.